बेलायतमा भारी हिमपात सँगै वर्षाले जनजीवन प्रभावित

एजेन्सी । बेलायतमा भारी हिमपात सँगै वर्षाले जनजीवन प्रभावित हुने भन्दै चेतावनी जारी भएको छ । 

यो साताको अन्त्यमा बेलायतमा भारी हिमपात सँगै चिसो बढ्ने कारण जनजीवनमा असर पर्ने भन्दै बेलायतको मौसम विभागले चेतावनी जारी गरेको हो । 

अन्तर्राष्ट्रिय सञ्चार माध्यमका अनुसार चिसो मौसमका कारण आगामी दिनमा विद्युत् कटौती, यातायात सेवा समेत अवरुद्ध हुनसक्ने बताइएको छ । अहिले इंगल्याण्ड, मिडल्याण्ड्स र वेल्सका धेरै जसो क्षेत्रमा हाल भारी हिमपात जारी रहेको छ । बिस्तारै स्कटल्याण्ड र उत्तरी आयरल्याण्ड लगायत अन्य क्षेत्र सम्म हिमपात फैलने बताइएको छ । 

भारी वर्षा र हिउँ पग्लने क्रम जारी रहँदा उत्तर–पश्चिम इंगल्याण्ड र वेल्सका केही भागहरूमा बाढी आउने आंकलन गरिएको समाचारमा उल्लेख छ । अहिले बेलायतको अधिकांश शहरहरुमा तापक्रम माइनस ८ दशमलव ६ पुगेको मौसम विभागले जनाएको छ ।