प्रचण्डले देउवालाई प्रधानमन्त्रीको अफर गरेको गगन थापाको खुलासा

काठमाडौं । नेपाली कांग्रेसका महामन्त्री गगन थापाले माओवादीका अध्यक्ष पुष्पकमल दाहाल प्रचण्डले सभापति शेरबहादुर देउवालाई प्रधानमन्त्री बन्न अफर गरेको बताएका छन् ।

कीर्तिपुरमा विहीबार आयोजित चुनावी सभालाई सम्बोधन गर्दै महामन्त्री थापाले प्रचण्डले देउवालाई प्रधानमन्त्री बनिदिनु पर्‍यो भनि आग्रह गरिरहेको खुलासा गरेका हुन् ।

‘अहिले भर्खर प्रचण्डले माथि आएर बोलेर जानुभएछ । यो यो कारणले सरकार बदलियो भनेर जानुभयो’, उनले भने, ‘अहिले पनि प्रचण्डले हप्तामा एकपटक कांग्रेसलाई खबर पठाउनु हुन्छ । लौन प्रधानमन्त्री बनिदिनु पर्‍यो भन्नुहुन्छ ।’

कांग्रेस संसदको ठूलो दल भएको प्रधानमन्त्री बन्ने तागत रहेको तर देशलाई समाल्न कांग्रेस प्रधानमन्त्री नबनेको उनी बताउछन् ।

महामन्त्री थापाले भने, ‘केपी ओली सँगसँगै सरकारमा छौं । इमान्दारितापूर्वक यो सरकारलाई तीन वर्ष लैजान चाहन्छौं । सरकार तलमाथि गर्ने काम गर्न चाहन्नौं ।’

सबै खालका प्रवृत्तिसँग कांग्रेस लड्ने महामन्त्री थापाले बताए । ठग जुन दलको भए पनि कारबाही गर्नेमा कांग्रेस रहेको जिकिर थियो ।