फुटबलको प्रतिष्ठित अवार्ड ‘बालोन डी ओर’ म्यानचेस्टर सिटीका मिडफिल्डर रोड्रीले हात पारे

एजेन्सी । म्यानचेस्टर सिटी र स्पेनका मिडफिल्डर रोड्रीले पहिलो पटक वर्षको उत्कृष्ट फुटबलरलाई प्रदान गरिने पुरुष बालोन डी’ओर को उपाधि जितेका छन् ।

‘बालोन डी ओर’ पुरुष फुटबलरहरुको प्रतिष्ठित अवार्ड मानिन्छ । फ्रान्सको पेरिसस्थित थिएटर डु शाटेलेटमा आयोजित एक  समारोहमा म्यानचेस्टर सिटीका मिडफिल्डर रोड्रीले यो वर्षको पुरुष ब्यालोन डी’ओर अवार्ड हात पारेका हुन् ।  रोड्रीले यो अवार्ड जित्नका लागि रियल म्याड्रिडका स्टार खेलाडीहरू भिनिसियस जुनियर र जुड बेलिंगह्यामलाई पछाडि पारेका छन् । भिनिसियस मुख्य दावेदार मानिए पनि अन्तिम समयमा रोड्रीलाई यस वर्षको सर्वश्रेष्ठ खेलाडी घोषित गरिएको हो ।

गत सिजन क्लब र देशका लागि एक खेल मात्र हारेका २८ वर्षीय रोड्रीले जुलाईमा स्पेनलाई युरो २०२४ जिताउन सहयोग गरेपछि पेरिसमा यो पुरस्कार प्रदान गरिएको हो ।उनले सिटीबाट प्रिमियर लिग, युइएफए सुपर कप र क्लब विश्वकप पनि जितेका थिए ।
उनी क्लबको इतिहासमा बालोन डी’ओर जित्ने पहिलो खेलाडी बनेका छन् ।