वैदेशिक रोजगारीमा जान लागेका १३२ श्रमिकहरूलाई अध्यागमन कार्यालयले रोकेकोप्रति नेपाल वैदेशिक रोजगार व्यवसायी संघको आपत्ति

काठमाडौं । वैदेशिक रोजगारीका लागि कुवेत र जोर्डन जान लागेका १३२ श्रमिकहरूलाई अध्यागमन कार्यालयले रोकेकोप्रति नेपाल वैदेशिक रोजगार व्यवसायी संघले आपत्ति जनाएको छ ।

शुक्रबार काठमाडौंमा पत्रकार सम्मलन गर्दै संघले कुवेत र जोर्डन जान लागेका १३२ जना श्रमिकहरूलाई अध्यागमन कार्यालयले बिना कारण रोकेको भन्दै आपत्ति जनाएको हो ।

संघले अध्यागमनले बिना कारण वैदेशिक रोजगारीमा जान रोक लगाउनु जाहेज नभएको भन्दै व्यवसायीलाई उचित क्षतीपूर्ति दिएर श्रमिकलाई वैदेशिक रोजगारीमा पठाउन माग समेत गरेको छ ।

वैदेशिक रोजगार विभागबाट कानून बमोजिम श्रम स्वीकृति लिएर वैदेशिक रोजगारीका लागि जान लागेका श्रमिकलाई अध्यागमन विभागका कर्मचारीले अनावश्यक दुःख दिई रोजगारीबाट वञ्चित गराउने उद्देश्यले हस्तक्षेप गर्नु गलत भएको संघको भनाइ छ । 

त्यस्तै, महिला पुनःस्थापना केन्द्र (ओरेक) ले पनि वैदेशिक रोजगारीको लागि कुवेत जान लागेका १३२ श्रमिकहरूलाई अध्यागमन कार्यालयले रोकेकोप्रति बिरोध जनाएको छ ।

ओरेकले वैदेशिक रोजगारीमा जाने श्रमिकहरुलाई सरकारले रोकेर संविधानमा भएको अधिकार खोस्ने काम गरेको आरोप समेत लगाएको छ । 

अध्यागमन कार्यालयले गत असार २४ गते जोर्डन जान लागेका १५ जना, २७ गते सलाम एयरलाईन्सबाट कुवेत जान लागेका १०१ जना र कुवेत एयरलाईन्सबाट जान लागेका १६ जना कामदारलाई रोकेको थियो ।