मकवानपुरको मनहरीमा दुई वटा ट्रक ठोक्किएर आगलागी हुँदा तीन जनाको मृत्यु, दुई जना गम्भीर घाइते

काठमाडौ । मकवानपुरको मनहरीमा दुई वटा ट्रक आपसमा ठोक्किएर आगलागी हुँदा तीन जनाको मृत्यु भएको छ । अन्य दुई जना गम्भीर घाइते भएका छन् ।

मनहरी गाउँपालिका–६ मा हेटौँडाबाट चितवन जाँदै गरेको ना ६ ख ६६६७ नम्बरको ट्रक र विपरीत दिशाबाट आउँदै गरेको ना ६ ख ६३१ नम्बरको ट्रक आपसमा ठोक्किएपछि आगलागी भएको हो ।

मृत्यु हुनेमा ना ६ ख ६६६७ नम्बरको ट्रकका चालक चितवन राप्ति नगरपालिका ८ का अन्दाजी २८ वर्षीय रिहान रुम्बा, सोही ट्रकका सहचालक गोरखाको गण्डकी गाउँपालिका २ गोर्दीटारका अन्दाजी २१ वर्षीय सुमन चेपाङ र ना ६ ख ६३१ नम्बरको ट्रकका सहचालक मकवानपुरको मनहरी गाउँपालिका ३ का अन्दाजी २० वर्षीय अमृत प्रजा रहेका छन्।

आज  बिहान पौने २ बजेतिर मनहरी–६ स्थित नयाँ बस्ती डिपाट गाउँमा दुई वटा ट्रक ठोक्किएको प्रहरीले जनाएको छ । आगलागीबाट दुवै ट्रक जलेर नष्ट भएको छ ।