मिटरब्याजी प्रकरणमा ठूला नेताहरुकै संलग्नता रहेको सांसदहरुको आरोप

नेकपा एमालेका प्रमुख सचेतक पदम गिरीले मिटरब्याजी प्रकरणमा राजनीतिक दलका ठूला नेता र प्रहरीका उच्च अधिकारीहरुको संलग्नता रहेको बताएका छन । आजको प्रतिनिधि सभा बैठकमा मिटरब्याजी पीडितका लागि अघि बढाउन खोजिएको नेपाल ऐनलाई संशोधन गर्ने विधेयक, २०८० माथिको छलफलमा भाग लिदै उनले मिटरब्याजीको संरक्षक राजनीतिक दलका ठूला नेताहरु भएको बताएका हुन । सचेतक गिरीले सो प्रकरणमा राष्ट्रसेवक कर्मचारी र प्रहरीका उच्च पदस्थ कर्मचारीहरु संलग्न रहेको जिकिर पनि गरे । 
प्रमुख सचेतक गिरीले विधेयक मिटरब्याजी पीडितलाई न्याय दिनका लागि नभइ झुक्याउनका लागि ल्याएको आरोप लगाए । जसपाका प्रमुख सचेतक प्रदीप यादवले गाउँको साहु महाजनभन्दा बढी सहकारी र लघुवित्त संस्था मिटरब्याजी भएको दाबी गरे । मिटरब्याजी सम्बन्धमा सरकारले एकतर्फी मात्र भएर बोल्न वा व्यवस्था गर्न नहुने उनको भनाइ छ । 
नेकपा माओवादी केन्द्रका सांसद माधव सापकोटाले विधेयक बनाउने र पारित गर्ने अहिलेको परिपाटीलाई बदल्नुपर्ने बताए । 
रास्वपाका सांसद् विराजभक्त श्रेष्ठले स्थापित राजनीतिक दलका नेताकै संरक्षणमा मिटरब्याज चलिरहेको दाबी गरे । मिटरब्याज सामाजिक समस्याका रुपमा रहेको भन्दै वित्तीय साक्षरता आवश्यक रहेको उनको भनाइ छ । 
स्वतन्त्र सांसद अमरेशकुमार सिंहले सरकारले गाउँगाउँमा गरिव जनतालाई विना धितो बैंकहरुबाट ऋण दिलाउने व्यवस्थाको ग्यारेन्टी गर्नुपर्ने माग गरे । 
सांसद सिंहले गाउँका गरिव जनताबाट निक्षेप संकलन गरेर बैंकहरुले ठूलो व्यापारीहरुलाई मात्रै ऋण दिने गरेकोमा आपत्ति समेत जनाए ।।