सुनकोसीमा खसेका तीन जना यात्रुको अवस्था अझै अज्ञात

सिन्धुली । सिन्धुलीको मध्यपहाडी लोकमार्ग अन्तर्गत गोलन्जोर गाउँपालिका – १ कुडुलेमा हाइलेक्स गाडी सुनकोशी नदीमा खस्दा तीन जना वेपत्ता भएका छन् । 

बेपत्ता हुनेहरु भक्तपुर सुर्यबिनायक नगरपालिका जगातीका  सवारी चालक ३२ वर्षीय अबिन बखे, ३० वर्षीय प्रनित स्यागु र ३७  वर्षीय बलराम घटुवा रहेका छन् । गाडीमा रहेका २७ वर्षीय सुशान्त कक्षपती भने हाम फालेर घाइते भएका छन् । उनको खुर्कोटस्थित शुभजिवन अस्पतलमा उपचार भइरहेको छ । 

शनिबार साँझ खोटाङको हलेसीबाट भक्तपुर आउदै गरेको इसुजु कम्पनिको हाइलेक्स गाडी आफै अनियन्त्रित भइ सुनकोशी नदिमा खसेको जिल्ला प्रहरी कार्यालय सिन्धुलीका प्रहरी प्रमुख गोबिन्दराज काफ्लेले बताए ।

सुनकोशी नदीमा बेपत्ता यात्रुको खोजबिनका लागि सशस्त्रको गोताखोरसहित टोली परिचालन गरिएको छ ।