बाजुरामा करेन्ट लागेर दुई जना घाइते

बाजुरा । बाजुरामा करेन्ट लागेर दुई जना घाइते भएका छन् । बुधबार बिहान बडिमालिका नगरपालिका वडा नम्बर ६ का २८ वर्षिया रुप बडुवाल र वडा नम्बर ४ का ३० वर्षिया राजेन्द्र नाथ करेन्ट लागेर घाइते भएका हुन् । 

बडिमालिका ६ जडाङगामा स्थानीय कोर्धालीगाड जलविद्युतको चुडिएको तार जोड्ने क्रममा उनीहरु घाईते भएको प्रहरीले जनाएको छ । स्थानीयहरुले स्थानीय विद्युतको तार जोड्ने क्रममा राष्ट्रिय प्रसारण लाइनमा तार लागेर घाइते भएको दाबि गरेका छन् । 

घटना बारे थप अनुसन्धान भइरहेको जिल्ला प्रहरी कार्यालय बाजुराका प्रहरी निरिक्षक रविन्द्रसिंह कार्कीले बताएका छन् । घाइते बडुवाल र नाथको जिल्ला अस्पतालमा उपचार भइरहेको छ । घाइते दुवै जनालाई थप उपचारका लागि धनगढी वा काठमाडौं लैजान चिकित्सकले सुझाव दिएका छन । 

केन्द्रीय प्रशारण लाइनसँगै तार जोडिएको पोलमा चढेपछि करेन्ट लागेको हुनसक्ने अनुमान गरिएको छ । लघुजलविद्युत आयोजनाको विद्यतु अफ भएपनि केन्द्रीय प्रशारण लाइनको विद्युत प्रवाह भएकै अवस्थामा पोलमा चढेपछि दुर्घटना भएको बताइएको छ । बाजुरामा विद्युतकै कारण केही वर्षयता मात्रै ११ जनाले ज्यान गुमाइ सकेका छन् । भने दर्जन बढी घाइते भएका छन् ।