साफ यु–२० च्याम्पियनसिप : आज माल्दिभ्स र भुटान खेल्दै

काठमाडौं । बिस वर्षमुनिको साफ च्याम्पियनशिप फुटबलमा बुधबार समूह ’बी’ का माल्दिभ्स र भुटान खेल्दैछन् । 

खेल ललितपुरको सातदोबाटोमा रहेको एन्फा कम्प्लेक्सको मैदानमा दिउँसो ३ बजे शुरू हुनेछ । मंगलबार भएको खेलमा बङ्गलादेशले श्रीलङ्कालाई हराएसँगै नेपाल एक खेलअघि नै सेमिफाइनलमा पुगेको छ । बङ्गलादेश पनि श्रीलङ्कालाई २–० गोलले हराएर सेमिफाइनलमा पुगेको छ ।

श्रीलङ्का भने लगातार दुई खेल हार्दै समूह चरणबाटै बाहिरिएको छ । नेपालले पहिलो खेलमा श्रीलङ्कालाई १–० गोलले हराएको थियो । बिहीबार नेपाल र बङ्गलादेशले खेल्नेछन् । यो खेलको विजेता टोलीले समूह विजेताका रुपमा सेमिफाइनल खेल्नेछ । 

प्रतियोगिताको समूह ’ए’ मा आयोजक नेपालसहित बङ्गलादेश र श्रीलङ्का तथा समूह ’बी’ मा भारत, माल्दिभ्स र भुटान छन् ।