प्रधानमन्त्रीले भारतसँग भूमि सट्टापट्टा गर्ने विषय उठाएको भन्दै प्रमुख प्रतिपक्षी एमालेको आपत्ति

yogeshbhattarai

प्रमुख प्रतिपक्षी दल नेकपा एमालेले प्रधानमन्त्री पुष्पकमल दाहालले भारत भ्रमणका क्रममा नेपालको भूमि सट्टापट्टा गर्ने जस्ता विषय उठाएको भन्दै प्रतिनिधिसभाको बैठकमा आपत्ति जनाएको छ । बैठकमा एमाले सांसद योगेश भट्टराईले समय लिएर बोल्दै नेपालको भूमि साट्ने अधिकार प्रधानमन्त्रीलाई नभएको बताएका हुन । सांसद भट्टराईले कालपानी लिपुलेक लिम्पियाधुरा कुनै पनि सर्तमा नेपालको भूमि विदेशीलाई दिने हक प्रधानमन्त्रीलाई नभएको उल्लेख गरे ।

सांसद भट्टराईले नेपालका लागि हवाई रुट, सीमा समस्या समाधान, डुबान, पञ्चेश्वर परियोजना लगायतका विषय चासोमा रहेको तर त्यसमा भ्रमणमा कुनै प्रगति नभएको उल्लेख गरे । भट्टराईले ईपीजीको बारेमा प्रश्न उठाउँदा परिस्थिति बिग्रिन्छ, डुबानबारे कुरा उठाउँदा, सीमाबारे प्रश्न उठाउँदा माहोल बिग्रन्छ भने के गर्दा चाहिँ सप्रिन्छ ? भनेर प्रश्न समेत गरे । सांसद भट्टराईले मन्त्रिपरिषद्ले राष्ट्रपति रामचन्द्र पौडेललाई उक्साएर नागरिकता विधेयक प्रमाणीकरण गरेको भनेर प्रश्न समेत उठाए ।

सांसद भट्टराईले प्रधानमन्त्रीले आफूसँग नभएको अधिकार प्रयोग गरेर राष्ट्रपतिलाई नागरिकता विधेयक प्रमाणीकरण गर्न सिफारिस गरेको भन्दै आपत्ति जनाएका हुन । राष्ट्रपति संसद्को अंग भएको र संसद्भन्दा माथि नभएको बताएका हुन् । राष्ट्रपति पौडेलले संसद्को अधिकार हनन गरेको भन्दै उनले राष्ट्रपतिले संसद्को मर्यादा ख्याल राख्नुपर्नेपनि स्पष्ट पारे । सांसद भट्टराईले नागरिकताजस्तो संवेदनशील विषयमा खेलवाड नगर्न पनि आग्रह गरे ।