इंग्लिस प्रिमियर लिगमा म्यानचेस्टर सिटीको विजयी सुरुवात

काठमाडौं । गत सिजनको विजेता म्यानचेस्टर सिटीले इंग्लिस प्रिमियर लिगको नयाँ सिजनमा विजयी सुरुवात गरेको छ ।

आइतबार राती  घरेलु मैदान स्टामफर्ड ब्रिजमा चेल्सी सिटीसँग २–० गोल अन्तरले पराजित भएको हो । सिटीको जितमा नर्वेली फरवार्ड एर्लीङ हालान्ड र चेल्सीकै पूर्व खेलाडी माटियो कोभाचिचले एक–एक गोल गरे । सिटीले जितका साथ तीन अंक जोडेको छ । 

अर्को खेलमा ब्रेन्टफर्डले नयाँ सिजनमा विजयी सुरुवात गर्ने क्रममा क्रिस्टल प्यालेसलाई २–१ ले पराजित गरेको छ । जिटेक कम्युनिटी रंगशालामा ब्रेन्टफोर्डलाई जित दिलाउन ब्रायन एमबेउमो र योअन विसाले गोल गरे । क्रिस्टल प्यालेसका लागि एक गोल आत्मघाती उपहार स्वरुप प्राप्त भयो । इथन पिनोकले आत्मघाती गोल उपहार दिएका हुन् । इङलिस लिगमा आज हुने खेलमा टोटेनहम ह्ट्सपर र लेस्टर सिटीले प्रतिस्पर्धा गर्दैछन् ।