रोल्पामा चर्चमाथि पहिरो खस्दा एक जनाको मृत्यु

रोल्पा । रोल्पामा चर्चमाथि पहिरो खस्दा एक जनाको मृत्यु भएको छ भने अर्की एक किशोरी घाइते भएकी छन्  । आइतबार बिहान ४ बजेतिर जिल्लाको रोल्पा नगरपालिका – २ मुलपानीमा रहेको बेथेल मण्डली चर्चमाथि पहिरो खसेको हो । 

पहिरोमा परी  रोल्पा नगरपालिका – १० धाङ्सी घर भइ सोही चर्चमा बस्दै आएकी धनजित बुढा मगरको मृत्यु भएको हो ।  पहिरोका कारण जिल्लाको सुनछहरी गाउँपालिका – ३ मौलावन घर भइ सोही चर्चमा बस्दै आएकी १८ बर्षीया नौभा घर्ती मगर घाइते भएकी छन् । घाइतेको जिल्ला अस्पताल रेउघामा उपचार जारी छ । 

चर्चामा १० जना बस्दै आएको भएपनि अरुको अवस्था सामान्य रहेको प्रहरीले जनाएको छ । अविरल वर्षाको कारण गत जेठ २८ गतेदेखि देशका विभिन्न स्थानमा आएको बाढी, पहिरो लगायतका विपद्रुमा परी शनिबार दिउँसोसम्म १ सय ८१ जनाको मृत्यु भैसकेको छ । 

देशभर २ सय २९ जना घाइते भएका छन् । ५० जना वेपत्ताको खोजी कार्य जारी छ । बाढीको कारण जम्मा ३ सय ८४ घर डुबानमा परेका छन् । ३ सय १० वटा घर, १ सय ७ वटा गोठ, ४९ वटा पुल, ४ वटा विद्यालय र २ वटा सरकारी कार्यालयमा क्षति पुगेको छ । ८ सय ३० वटा पशु चौपायको मृत्यु भएको छ । उक्त अवधिमा विपद्रुका घटनाबाट ४ हजार ६ सय ८९ घर परिवार विस्थापित भएका छन् ।