प्रिमियर लिगमा म्यानचेष्टर युनाइटेडको विजय सुरुवात

काठमाडौं । म्यानचेष्टर युनाइटेडले इङलिस प्रिमियर लिगको नयाँ सिजनमा विजय सुरुवात गरेको छ । शुक्रबार राति ओल्ड ट्राफोर्डमा भएको खेलमा युनाइटेडले फुलहामलाई १–० गोल अन्तरले पराजित गर्यो । 

खेलको ८७ औँ मिनेटमा जोसुआ जिर्कजीको निर्णायक गोलमा युनाइटेडले अंक तालिकामा खाता खोलेको हो । यसै सिजन ३६ मिलियन खर्चेर टोलीमा भित्राएका जिर्कजी नायक बन्दा युनाइटेडले विजय सुरुवात सुखद गरेको हो ।
 
जितसँगै युनाइटेड अंक तालिकाको शीर्ष स्थानमा छ । पराजित फुलहम पुछारमा छ ।  लिगमा शनिबार राति ६ खेल हुनेछन् । लिभरपुलले यसै सिजन बढुवा भएको इप्सविच टाउनसँग खेल्दै नयाँ सिजनको सुरुवात गर्नेछ । लिगभरपुलले पछिल्लो ६ वर्षमा ५ पटक बढुवा भएको टोलीसाग खेल्दै सिजनको सुरुवात गरेको छ । 

इप्सविच टाउनले लिगका पछिल्ला १० सुरुवाती खेलमा हार व्यहोरेको छैन । शनिबार नै हुने अर्को खेलमा आर्सनलले वुल्भसविरुद्ध खेल्दैछ ।