चलचित्र  ‘बुलाकी’ आजदेखि पुनः प्रदर्शनमा

काठमाडौं । चलचित्र  ‘बुलाकी’ शुक्रबारदेखि पुनः प्रदर्शनमा आएको छ । 

यसअघि २०८० वैशाख १ गते सुपरहिट चलचित्र  ‘जारी’सँगै प्रदर्शनमा आएको चलचित्रले त्यो समयमा उचित शो नपाएको भन्दै तेस्रो दिनमै हलबाट उतारेको थियो। तर, आजबाट भने चलचित्र पुनः हलमा प्रदर्शन भएको छ।

अभिनेत्री सुरक्षा पन्त अभिनित यस चलचित्रमा पश्चिम नेपालमा हुने जारी प्रथालाई समेटिएको छ । चलचित्रमा कर्णालीको ग्रामीण जीवन र महिलाको दुःखलाई  देखाइएको छ ।

लक्ष्मण सुनारको निर्देशनमा बनेको ‘बुलाकी’मा सुरक्षा पन्त सँगै रमेश बुढाथोकी, लक्ष्मी गिरी, सुशील पोखरेल, कुलदीप अधिकारी, धनबहादर राई, लक्ष्मण देवकोटा, झलनाथ खत्री, सोनु सेढाइ, प्रकाश कँडेल लगायतको पनि अभिनय छ । 

टोपेन्द्र विष्ट निर्माता र शिवराज पौडेल कार्यकारी निर्माता रहेको यो चलचित्रमा शिव ढकालको छायांकन, राजबहादुर सानेको लेखन तथा चलचित्र चौतारीको सम्पादन छ । 

यस्तै, नेपाली चलचित्र  ‘बुलाकी’को अलावा आजैबाट दुई हिन्दी चलचित्र  ‘स्त्री २’ र ‘खेल खेल में’ प्रदर्शनमा आएका छन्। स्त्री २ मा श्रद्धा कपुर, राजकुमार राव, पंकज त्रिपाठी लगायतका कलाकारको भूमिका रहेको छ भने खेल खेल मेँ मा अक्षय कुमार, तापसी पन्नु, वाणी कपूर लगायतका कलाकारको अभिनय रहेको छ।