स्पेनिस ला लिगा : बिल्बाओ र गेटाफे बराबरीमा रोकिए

काठमाडौं । स्पेनिस ला लिगा फुटबलको नयाँ सिजन बिहीबार रातिबाट सुरु भएको छ । राति भएको पहिलो खेलमा एथ्लेटिको बिल्बाओ र गेटाफेले बराबरी खेल्दै अंक बाँडेका छन् । 

पहिलो खेलमा बिल्बाओ र गेटाफेले १–१ को बराबरीमा रोकिएका हुन् । ओहन सासेटको गोलले बिल्बाओले २७ औं मिनेटमा अग्रता लिएको थियो । क्रिससान्टोस उचेले ६४ औं मिनेटमा बराबरी गोल गरे । बराबरीसँगै दुबै टिमले एक एक अंक जोडेका छन् । 

यस्तै, जिरोनाले रियल बेटिसलाई १–१ को बराबरीमा रोकेको छ । मार्क बारट्राले छैटौं मिनेटमा गोल गर्दै बेटिसलाई सुरुआती अग्रता दिलाएका थिए । ग्याब्रिएल मिसहोयले ७२ औं मिनेटमा जिरोनाका लागि बराबरी गोल फर्काए । 

पहिलो खेलमा दुवै टिमले एक–एक अंकमा चित्त बुझाएका हुन् । गत सिजन आश्चर्यजनक टिम रहेको जिरोनाले तेस्रो स्थान हात पारेको थियो ।