पेट्रोलियम पदार्थको मूल्य घट्यो

काठमाडौं । नेपाल आयल निगमले पेट्रोलियम पदार्थको मूल्य घटाएको छ । बिहीबार बसेको निगम सञ्चालक समितिको बैठकले शुक्रबारदेखि लागू हुने गरी पेट्रोलियम पदार्थको मूल्य घटाउने निर्णय गरेको हो ।

 निगमले पेट्रोलको मूल्य प्रतिलिटर  पाँच रुपैयाँ तथा डिजेल र मट्टितेलको मूल्य प्रतिलिटर तीन रुपैयाँ घटाएको जनाएको छ । 

निगमका अनुसार पहिलो वर्गमा पेट्रोलको मूल्य प्रतिलिटर  एक सय ६७ रुपैयाँ रहेकामा एक सय ६२  रुपैयाँ कायम भएको छ । दोस्रो वर्गका लागि प्रतिलिटर र एक सय ६९  रुपैयाँ रहेकामा एक सय ६४  रुपैयाँ र तेस्रो वर्गका लागि प्रतिलिटर  एक सय ७०  रुपैयाँ  रहेकामा एक सय ६५  रुपैयाँ कायम गरिएको छ । 

साथै डिजेल र मट्टितेलको मूल्य पहिलो वर्गका लागि  एक सय ५५  रुपैयाँ रहेकामा  एक सय ५२  रुपैयाँ कायम गरिएको छ । साथै दोस्रो वर्गका लागि एक सय ५७  रुपैयाँ रहेकामा एक सय ५४  रुपैयाँ र तेस्रो वर्गका लागि एक सय ५८  रुपैयाँ रहेकामा  एक सय ५५  रुपैयाँ कायम गरिएको निगमले जनाएको छ । 

पहिलो वर्गमा चारआली, बिराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्ज छन् । साथै दोस्रो वर्गमा  सुर्खेत र दाङ  तथा तेस्रो वर्गमा पोखरा, काठमाडौँ, दीपायललाई राखिएको छ । 

 

रासस