चलचित्र ‘१२ गाउँ’ पनि दशैंको फूलपातिमा प्रदर्शन हुने

काठमाडौं । अभिनेता विराज भट्ट निर्देशित चलचित्र ‘१२ गाउँ’ पनि दशैंको फूलपातिमा  प्रदर्शन हुने भएको छ । 

चलचित्रको  टिजर पोस्टर सार्वजनिक गर्दै  भट्टले चलचित्र प्रदर्शन मितिको  घोषणा गरेका हुन् । यसका साथै दशैंको फूलपाती अर्थात् असोज २४ गते बक्स अफिसमा नेपाली चलचित्रबीच त्रिपक्षीय भिडन्त हुने भएको छ । अब फूलपातीमा  ‘१२ गाउँ’सहित ‘छक्कापञ्जा ५’ र ‘ज्वाइँ साब’ पनि प्रदर्शन हुनेछन् ।

भट्टले छोरा समीर भट्टको एक्सन लुक समेटिएको पोस्टर सेयर गर्दै लेखेका छन्, ‘लामो समय देखि सिनेमा क्षेत्रमा काम गर्दै दर्शकले मलाई एक्सन फिल्ममा साथ दिदैं गर्दा नेपाली एक्सन फिल्मलाई अन्तराष्ट्रिय स्तरमा कसरी चिनाउने भन्ने मेरो चिन्तन र यसपटक १२ गाउँमार्फत मैले त्यो प्रयास गरेको छु । यसमा समीर भट्टले पनि लामो समयदेखि आफ्नो अभ्यासलाई दसौँ वर्ष एउटा तपस्वी जस्तै निरन्तरता दिएको छ । मलाई आशा छ दर्शकको माया, साथ र आशीर्वाद १२ गाउँ लाई मिल्ने छ ।’

यसमा भट्ट पनि मुख्य भूमिकामा छन् भने पूर्वमिस नेपाल इन्टरनेशनल न्यान्सी खड्का, मोडल सनिशा भट्टराई, मुरलीधर, दीया मास्के, अर्जुन जंग शाही, कनिज कोइराला, नरेन खड्का, कृष्ण भट्ट लगायतको अभिनय रहेको छ । 

अर्जुन पोखरेल र निरजको संगीत, रामजी लामिछाने, सुनिल क्षेत्री र कविराज गहतराजको कोरियोग्राफी तथा प्रवीन केएल र भुपेन्द्र अधिकारीको सम्पादन रहेको यस चलचित्रको  कथा भट्ट आफैले लेखेका हुन् ।