चलचित्र  ‘छक्का पन्जा ५’को पहिलो गीत ‘बिहे भाको छैन’ सार्वजनिक

काठमाडौं । चलचित्र  ‘छक्का पन्जा ५’को पहिलो गीत ‘बिहे भाको छैन’ सार्वजनिक भएको छ । 

आगामी असोजको २४ गते फूलपातीको दिनबाट सार्वजनिक प्रदर्शनमा आउने तयारीमा रहेको चलचित्रले पहिलो गीत सार्वजनिक गरेको  हो । उक्त  ‘बिहे भाको छैन’ बोलको गीतमा सविन सुवेदी र बेनिशा पौडेलको स्वर रहेको छ भने दीपकराज गिरी र दीपक शर्माको शब्द तथा दीपक शर्मा स्वयंको संगीत रहेको छ । 

सुनिल क्षेत्रीले कोरियोग्राफी गरेको गीतको भिडियोमा चलचित्रका मुख्य दुई कलाकार दीपकराज गिरी र वर्षा सिवाकोटीको अभिनय छ । लोक शैलीमा तयार गीतले दुई व्यक्तिको प्रेमकथा प्रस्तूत गरेको छ । 

दीपाश्री निरौला निर्देशित यस चलचित्रमा निर्मल शर्मा, तेज गिरीसहित अभिनेता आचार्य सिग्देल केमियो भूमिकामा छन् । हरि हुमागाइँको डिओपी तथा उत्तम हुमागाइँको छायांकन रहेको चलचित्रमा दीपकराज स्वयंको पटकथा लेखन छ भने कथा र संवादमा उनलाई केदार घिमिरे र दीलिप तामाङले सघाएका छन् ।

चलचित्रमा रोशन श्रेष्ठको द्वन्द्व निर्देशन तथा विपिन मल्लको सम्पादन रहेको छ ।