काभा महिला नेसन्स भलिबल लिगमा भारतमाथि नेपालकोे ऐतिहासिक जित

काठमाडौं । काभा महिला नेसन्स लिग महिला भलिबलमा नेपालले भारतमाथि ऐतिहासिक जित हात पारेको छ । 

त्रिपुरेश्वरस्थित दशरथ रंगशालामा रहेको कभर्ड हलमा नेपालले भारतलाई ३–२ को सेटमा हराएको हो । यसअघिका कुनै पनि प्रतिस्पर्धामा भारतविरुद्ध नेपालले जित हासिल गर्न सकेको थिएन् । प्रतिस्पर्धात्म खेलमा घरेलु समर्थकको साथ पाएको नेपालले भारतलाई २५–१८, १२–२५, २५–१७, १८–२५, १५–१३ को सेटमा पाखा लगायो ।

यसअघि नेपाल र भारतबीचको महिला भलिबलमा सबैभन्दा उत्कृष्ट प्रदर्शन २०१९ को दक्षिण एसियाली खेलकुद (साग) को फाइनल दशरथ रंगशालामा थियो । उक्त खेलमा नेपाल ३–२ को सेटमा पराजित भएको थियो । जितसँगै नेपाल ५ अंक जोड्दै काभा भलिबलको दोस्रो स्थानमा उक्लिएको छ । भारत ७ अंकका साथ पहिलो स्थानमा छ । नेपालले पहिलो खेलमा श्रीलंकालाई ३–० को सेटमा हराएको थियो ।

भारतले पहिलो खेलमा इरानलाई ३–१ र दोस्रो खेलमा माल्दिभ्सलाई ३–० को सोझो सेटमा हराएको थियो । प्रतियोगितामा नेपालसहित भारत, इरान, माल्दिभ्स र श्रीलंका सहभागी छन् । शीर्ष चार टोलीले सेमिफाइनल खेल्नेछन् ।