प्राध्यापक विष्टको हत्या आरोपी १७ वर्षपछि पक्राउ

काठमाडौ । प्राध्यापक धर्मराज विष्टको हत्यामा संलग्न भएको आरोपमा १७ वर्षपछि प्रहरीले एक व्यक्तिलाई पक्राउ गरी सार्वजनिक गरेको छ । नेपाल कमर्स क्याम्पसका प्राध्यापक विष्टको हत्या आरोपी ३९ बर्षिय रञ्जन खड्कालाई प्रहरीले पक्राउ गरी सार्वजनिक गरेको हो ।

कामनपा–३२ बस्ने आरोपी खड्कालाई  त्रिभुवन अन्तर्राष्ट्रिय विमानस्थल अगाडीबाट साउन १५ गते पक्राउ गरिएको हो ।घटनापछि रञ्जन लामो समयसम्म भारतमै बसेको खुलेको छ। 

सोही घटनामा संलग्न रहेको आरोपमा प्रहरीले यसअघि सविता थापा र विनोद थापालाई पक्राउ गरी कारबाही अघि बढाएको थियो । खड्का र   भक्तपुर  बस्ने राजिव पाण्डे सहितको समूहले रड र ईट्टा समेत प्रहार गरी घाईते बनाई बेहोस अवस्थामा छोडी फरार रहेकोमा प्राध्यापक विष्टको उपचारको क्रममा वीर अस्पतालमा मृत्यु भएको थियो । पाण्डे २०६९ वैशाख २१ गते पक्राउ परेको र २०७६ जेठ १५ गते छुटेको  थिए भने सोभिता चैतमा पक्राउ परि  धरौटी बुझाएर पुर्पक्षमा छिन्।