ओली अत्यन्तै अध्ययनशील र मिहिनेती हुनुहुन्छ: देउवा

सत्तारूढ दल नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओली अत्यन्तै मिहिनेती, अध्ययनशील र अनुभवी भएको बताएका छन् ।आइतबार प्रतिनिधिसभामा बोल्दै देउवाले असार १७ गते कांग्रेस–एमालेबीच भएको सहमतिमा कांग्रेस दृढ रहेको पनि बताए । एमाले पनि सहमतिमा दृढ रहने विश्वास आफूलाई रहेको उनको भनाइ छ । 

“प्रधानमन्त्री अत्यन्तै अध्ययनशील, मिहिनेती र अनुभवी हुनुहुन्छ । उहाँको मन्त्रिमण्डलका साथीहरू पनि योग्य सक्षम हुनुहुन्छ । उहाँहरूको नेतृत्वमा मुलुकले उन्नतिको नयाँ बाटो सम्हाल्ने छ,” उनले भने । 

देउवाले वर्तमान सरकार विधिको शासन, संविधानको पूर्ण कार्यान्वयनका लागि उचित कानुन र लगानीको उचित वातावरण तयार गर्दै रोजगारीका अवसर सिर्जना र चलायमान अर्थतन्त्रको ठोस निर्माण गर्ने विश्वास आफूमा रहेको बताए । अहिलेको सत्ता गठबन्धन राजनीति स्थिरताको बाटोमा अघि बढ्न सफल हुने उनको विश्वास छ ।