समलताल बस दुर्घटना: रौतहटको दुई परिवारका चार-चार जना बेपत्ता, गाँउनै शोकमग्न

नारायणगढ–मुग्लिन सडकखण्डको सिमलतालमा शुक्रबार भएको बस दुर्घटनामा रौतहटको दुई परिवारका चार–चार जना बेपत्ता भएका छन् ।  दुर्घटनामा बौधिमाई नगरपालिका वडा नं. ३ मटिअर्वा र गरुडा नगरपालिका वडा नम्बर ९ सिसवाका एकै परिवारका चार—चार जना बेपत्ता भएका हुन् । बौधिमाई मटिअर्वाका ५८ वर्षका परशुराम साह श्रीमती मीना देवी, छोरी रिंकु र ज्वाई नरेश साह दुर्घटनामा परी बेपत्ता छन् । बसमा सँगै रहेका परिवारका ५ जना मध्ये सरोज साह भने दुर्घटनामा जोगिएका छन । काठमाडौँमा छोरा कृष्णनन्दन साहको नेपाली सेनाको ९ महिने तालिम पश्चातको पासआउट समारोहमा सहभागी भएर फर्कदै गर्दा उनीहरु दुर्घटनामा परेका हुन् । 
बुवा आमा सहित दिदी भिनाजु पनि बेपता भएको खबर सुनेर घर आएकी परशुरामकी जेठी छोरीको रोदनले गाँउनै शोकमग्न छ । बस दुर्घटनामा जोगिएका गरुडा नगरपालिका वडा नम्वर ९ सिसवाका ५० बर्षिय जुगेश्वर राय यादवको परिवारका चार जना पनि बेपत्ता छन् । उनी २७ वर्षिया छोरी अमृता यादव, ७ बर्षिय छोरा अशोक, ३ वर्षका नाति शिवशंकर र डेढ बर्षको नातिनी सहित उपचारका लागी काठमाडौं गएका थिए । सोही क्रममा उनीहरु दुर्घटनामा परेका हुन् । बस दुर्घटनाको खबर सुने पछि जुगेश्वरकी श्रीमती उमादेवी यादवको अवस्था निकै कारुणीक बनेको छ ।