कृषिलाई कर नीतिमार्फत संरक्षण गर्ने नीति सरकारले लिएको अर्थमन्त्री पुनको दाबी

अर्थमन्त्री वर्षमान पुनले सरकारले कृषिलाई कर नीतिमार्फत संरक्षण गर्ने नीति लिएको बताएका छन । आज काठमाडौंमा आयोजित कार्यक्रममा उनले आगामी वर्षको बजेटमार्फत आफ्नो कृषि उत्पादनलाई नीतिगत रुपमा संरक्षण गर्ने, कर नीतिमार्फत संरक्षण गर्ने नीति लिइएको दाबी गरेका हुन । मन्त्री पुनले चालु आर्थिक वर्षमा कृषि उत्पादनहरुमा भ्याट लगाइएको भएपनि सरकारले आगामी आर्थिक वर्षका लागि ल्याएको बजेटमा कृषिलाई संरक्षण गर्न मूल्य अभिबृद्धि कर हटाएको जानकारी दिए । 
मन्त्री पुनले सरकारले २०८१—२०९१ लाई कृषि दशक घोषणा गरेको उल्लेख गर्दै राजनीतिक नेतृत्व र मन्त्रीहरु फेरिएपनि नीति नफेरिने प्रतिवद्धता जनाए । नीतिगत स्थायित्व भएमात्रै देश विकास हुने उनले बताए । अर्थमन्त्री पुनले नेपालले आइटी क्षेत्रमा विश्वसँग प्रतिष्पर्धा गर्नसक्ने उल्लेख गरे । पर्यटन, जलविद्युत क्षेत्रमा विश्वसँग प्रतिष्पर्धा भन्दै उनले पर्यटन क्षेत्रमा यस वर्ष मात्रै २१ प्रतिशतको बृद्धिदर रहेको दाबी गरे । अन्य सबै क्षेत्रमा शिथिलता भएको अवस्थामा पनि पर्यटनमा २१ र जलविद्युत क्षेत्रमा १९ प्रतिशतको वृद्धि रहेको रहेको उनको भनाइ थियो ।