एकीकृत समाजवादी पार्टीको महाधिवेशन आज सकिदै

नेकपा एकीकृत समाजवादी पार्टीको महाधिवेशन आज समापन हुँदैछ । काठमाडौंको प्रज्ञा भवनमा गत १६ गते शुरु भएको महाधिवेशन पदाधिकारी र केन्द्रीय सदस्य पनि सर्वसम्मत चयन गर्दै सकिन लागेको हो । दिउँसो ३ बजेसम्म नयाँ नेतृत्व टुंगो लगाएर महाधिवेशन सक्ने तयारी पार्टीको छ । एकीकृत समाजवादीमा २१ पदाधिकारीसहित २९९ सदस्यीय केन्द्रीय कमिटी बनाउने विधान छ । बिहीबार पार्टीको अध्यक्षमा माधव नेपाल , सम्मानित नेतामा झलनाथ खनाल र महासचिव घनश्याम भुसाल सर्वसम्मत चयन गरेको थियो । एमालेबाट २०७८ भदौमा अलग भएपछि पहिलो पटक भएको महाधिवेशनबाट मुख्य तीन पदमा पुरानै नेतृत्वले निरन्तरता पाएको हो ।