असई थमन विक हत्यामा संलग्न फरार पूर्वसांसद यादव पक्राउ

सशस्त्र प्रहरी बलका असई थमन विक हत्यामा जन्मकैदको सजाय पाएका पूर्वप्रदेश सांसद कौशलकुमार यादव पक्राउ परेका छन् ।फरार रहेका यादवलाई शनिबार राति महोत्तरीको साम्सी गाउँपालिका ५ पोखरीभण्डाबाट पक्राउ गरिएको हो । पक्राउ परेका यादवलाई आइतबार नै जिल्ला अदालत महोत्तरीमा उपस्थित गराइएको छ ।हाल लोसपाका नेता रहेका यादव २०७४ मा तत्कालीन संघीय समाजवादी फोरमबाट प्रदेश सांसद बनेका थिए । सजाय सुनाइए पनि उनी लामो समयदेखि फरार सूचीमा थिए ।

यो प्रकरणमा अभियुक्त रहेका एमाले प्रतिनिधिसभा सदस्य लक्ष्मी महतो कोइरी र पुर्पक्षका लागि थुनामा रहेका पवन कापरले भने सफाइ पाएका थिए ।

मधेस आन्दोलनका क्रममा २५ भदौ २०७२ मा महोत्तरीमा सशस्त्र प्रहरी बलका असई थमन विकको हत्या भएको थियो । उक्त मुद्दामा २८ जनाविरुद्ध कर्तव्य ज्यान मुद्दा दर्ता भएको थियो ।महोत्तरी जिल्ला अदालतले २८ मंसिरमा असई थमन विक हत्या प्रकरणमा लोसपा मधेस प्रदेश संसदीय दलका नेता अभिराम शर्मा र सांसद यादवसहित सात जनालाई जन्मकैदको सजाय सुनाएको थियो ।