गोर्खा मिडियामा लगानी भएको रकममा सहकारी छानबिन समितिको चासो

सहकारी छानबिन समितिले गोर्खा मिडियामा अन्य सहकारीबाट प्रवाह भएको रकमको स्थितिबारे अनुसन्धान गर्ने निर्णय गरेको छ । आज बसेको समितिको बैठकले सो निर्णय गरेको हो । विवादित सहकारीको पछिल्लो साधारसभाको विवरण, लेखापरीक्षण प्रतिवेदन, सञ्चालक समितिको विवरण, लेखा सुपरीवेक्षणको परीक्षण, अन्य आवश्यक वित्त विवरणको कागजात मगाई अनुसन्धान गर्ने निर्णय बैठकले गरेको हो । बैठकले अन्य सहकारीबाट गोर्खा मिडियामा प्रवाह भएको रकमको स्थितिमा समेत ६ वटा बुँदासहित ९ वटा सहकारीको कागजात माग गर्ने निर्णय गरेको हो । गोर्खा मिडियामा प्रवाह भएको रकममा समितिले चासो देखाएको छ । त्यस्तै बैठकले सहकारीको अनुसन्धानका लागि सम्बन्धित पक्षसँग छलफल गर्ने पनि गरेको छ । यसअघि गत असार ५ गते बसेको बैठकले कानून मन्त्रालय र कानून आयोगका पदाधिकारीसँग छलफल गरेको थियो । कार्यदेशसँग सम्बन्धित कानूनको स्पष्टता, अधिकार क्षेत्रको बाँडफाँडलगायत विषयमा छलफल गरेको समितिले तीन महिनाको समय पाएको छ । जेठ १५ गते गठन भएको समितिले करिब एक महिना छलफलमै सकेको छ ।