आईसीसी टी–२० विश्वकप क्रिकेटको सुपर आठका खेल आज देखि सुरु

आईसीसी टी–२० विश्वकप क्रिकेटको सुपर आठका खेल आज देखि सुरु हुँदै छन् । अमेरिका र वेस्टइन्डिजले आयोजना गरेको विश्वकप अन्तर्गत सुपर आठ देखि सेमिफाइनल र फाइनल खेल भने वेस्टइन्डिजमा मात्रै हुने छन् । समूह चरणका केही खेलहरू अमेरिकामा भएका थिए । बुधवार पहिलो सुपर आठको खेलमा दक्षिण अफ्रिका र अमेरिका आमने सामने हुने छन् । समूह चरणमा दक्षिण अफ्रिका समूह डीबाट विजेताको रूपमा रहेको थियो भने अमेरिका समूह एको उपविजेता हो । सुपर आठको खेल नेपाली समय अनुसार राति सवा ८ बजेदेखि सर भिभिएन रिचार्ड्स स्टेडियममा हुने छ । दक्षिण अफ्रिकाले लगातार विश्वकप खेल्दै आए पनि अमेरिका भने पहिलो पटक विश्वकप खेलेको टिम हो । यी दुई बिचको खेल पहिलो पटक हुन लागेको हो । सेमिफाइनल यात्राको लय कायमै राख्नका लागि दुवै टिमलाई जितको खोजिमा हुनेछन् ।