विश्वकप र एसिया कपको छनोटअन्तर्गत नेपालले आज यमनको सामना गर्दै

फिफा विश्वकप २०२६ र एसिया कप २०२७ को संयुक्त छनोटअन्तर्गत समूह एचको आफ्नो अन्तिम खेलमा नेपालले आज यमनको सामना गर्दै छ । खेल साउदी अरेबियाको दमामस्थित प्रिन्स मोहम्मद बिन फहाद स्टेडियम राति पौने १२ बजे सुरु हुने छ । खेल यमनमा हुनुपर्ने भएपनि नेपाललाई आतिथ्यता दिन नसक्ने बताएपछि खेल न्युट्रल भेन्युमा हुन लागेको हो । नेपाली राष्ट्रिय टिमका कप्तान तथा गोलरक्षक किरण चेम्जोङले आज नेपालका तर्फबाट १ सयौँ खेल खेल्दै छन् । उनी नेपालका लागि १ सय अन्तर्राष्ट्रिय क्याप जित्ने पहिलो र एकमात्र खेलाडी बन्न लागेका हुन । नेपाल यसअघिनै फिफा विश्वकप छनोटबाट बाहिरिइसकेको छ ।  समूह ’एच’ मा नेपाल चार टिममध्ये सबैभन्दा पुछारमा छ । दोस्रो चरणमा ५ खेल खेलेको नेपालले १८ गोल बेहोर्दा एक गोल पनि गर्न सकेको छैन ।