विद्यार्थी पक्राउको विरोधमा मोरङमा विद्यार्थीको हिंसात्मक प्रदर्शन

महेन्द्र मोरङ आर्दश बहुमुखी क्याम्पस स्ववियु सदस्य दीपक यादवको रिहाइ माग गर्दै विद्यार्थीहरूले सरकारी गाडीमा आगजनी गरेका छन् । आज विराटनगरस्थित क्याम्पस अगाडी प्रदेश योजना आयोगको को १ झ ६४४ नम्बरको स्करपियो गाडीमा आगजनी भएको हो । रंगेली नगरपालिकामा भएको अपारदर्शी गतिविधिको विरोध गरिरहँदा स्ववियु सदस्य यादवसहित ६ जनालाई प्रहरीले पक्राउ गरेको विरोधमा विद्यार्थी आन्दोलित भएका हुन । यसक्रममा विद्यार्थीहरूले ६ वटा गाडीमा आगजनी र तोडफोड गरेको जिल्ला प्रहरी कार्यालय मोरङले जनाएको छ । योजना आयोगका उपाध्यक्ष डा. राजेन्द्र अधिकारी चढेको गाडी क्याम्पसको मुलद्वारअघि तोडफोड गर्दै आगजनी गरिएको हो । त्यसैगरी, नेकपा एमाले जिल्ला पार्टी कार्यालय नजिक एक पार्टी प्यालेसमा पार्किङमा राखिएको ५ वटा गाडी तोडफोड भएको छ ।  नेपाल विद्युत प्राधिकरणको कार्यक्रम चलिरहँदा राखिएको गाडीमा तोडफोड भएको हो । प्रहरीका अनुसार बा ए.बी ८१८०, बागमती प्रदेश ०१–०० ञ २७०१, बा १ ञ २४१९, बा ००१ ञ २९९० र बा १ ञ १८८७ नम्बरको गाडीमा तोडफोड गरिएको छ । रंगेली नगरपालिकाले शिक्षक नियुक्ती, नीजी विद्यालयको शुल्ककम गनुपर्ने विषयमा केही दिनअघि अपरादर्शी रूपमा काम गरेको जनाउँदै विद्यार्थी केही समयदेखि आन्दोलित छन । सो क्रममा छ जना विद्यार्थीमाथि मुद्दा प्रक्रिया अघि बढाएपछि आज प्रदर्शन भएको हो ।