बञ्चरेडाँडा क्षेत्रस्थित सुख्खा फोहोर बिक्रीका लागि पुनः बोलपत्र आह्वान

काठमाडौं महानगरपालिकाले बञ्चरेडाँडा क्षेत्रमा विसर्जन हुँदै आएको सुख्खा फोहोर बिक्रीका लागि पुनः बोलपत्र आह्वान गरेको छ । बञ्चरेडाँडा पुगेको फोहोर वर्गीकरण गरी बिक्रीका लागि महानगरले २२ करोड ४८ लाख रुपैयाँमा बोलपत्र आह्वान गरेको हो । हाल बञ्चरेडाँडा ल्यान्डफिल साइट सञ्चालनको जिम्मा काठमाडौं महानगरपालिकाको छ । काठमाडौं महानगरपालिकाका दुईवटा वडाले मात्र फोहोर स्रोतमा कुहिने र नकुहिने रूपमा वर्गीकरण गर्दै आएका छन् । बञ्चरेडाँडा ल्यान्डफिल साइट भित्रको फोहोर पुनः प्रयोग, पुन चक्रिय प्रयोग गर्न इच्छुक व्यक्ति, संघ—संस्थाले जेठ ५ गतेभित्र प्रस्ताव पेश गर्न सक्ने महानगरले जनाएको छ ।हाल धादिङको धुनिबेसी नगरपालिका वडा नम्बर १ को कुँडुले बञ्चरेडाँडा ल्यान्डफिल साइट क्षेत्रमा काठमाडौं महानगरपालिकासहित २१ वटा नगरपालिकाले फोहोर विसर्जन गर्दै आएका छन् । काठमाडौं महानगरले यसअघि पनि टेन्डर आह्वान गरेको थियो। तर प्रस्ताव नपरेपछि पुनः बोलपत्र आह्वान गर्नुपरेको महानगरले जनाएको छ । काठमाडौं उपत्यकाबाट दैनिक सरदर १ हजार ४०० टन फोहोर बञ्चरेडाँडा ल्यान्डफिल साइटमा विसर्जन हुँदै आइरहेको छ । वर्गीकरण नगरी सुख्खा र कुहिने फोहोर एकै ठाउँमा राखेर विसर्जन गर्दा बञ्चरेडाँडा ल्यान्डफिल साइटको आयु घटिरहेको महालेखाले पनि औल्याएको छ । शहरी विकास मन्त्रालयले बनाएको कार्यविधिअनुसार फोहोर व्यवस्थापन नहुँदा २० हजार घनमिटर क्षमताको पोखरी पनि भरिएर कोल्पु खोला क्षेत्रमा हानिकारक रसायन मिसिन पुगेको छ।