दक्षिण अफ्रिकामा सत्तारूढ 'एएनसी' ले ३ दशक पुरानाे बहुमत गुमायाे

दक्षिण अफ्रिकामा सत्तारुढ अफ्रिकन नेसनल कंग्रेस– एएनसीले तीस वर्षपछि बहुमत गुमाएको छ । आईतबार राती सार्वजनिक संसदीय निर्वाचनको मतपरिणाम अनुसार एएनसीसीले कुल ४ सय सिटमा जम्मा १ सय ५९ सिट जितेको छ । सन् १९९४ यता एएनसीले पहिलो पटक बहुमत गुमाएको हो । बहुमत गुमाए पनि एएनसी नै सबैभन्दा ठूलो दल बनेको छ । त्यस्तै मुख्य विपक्षी डेमोक्रेटिक अलायन्स डिकेले ८७ सिटमा जित हासिल गरेको छ भने पूर्वराष्ट्रपति ज्याकब जुमाको पार्टी एमकेले ५८ सिट जितेको छ । इकनोमिक फ्रिडम फाइटर ईएफएफले ३९ सिटमा जित हासिल गरेको छ । संसद्रुमा कुनै दलले पनि बहुमत नपाएपछि नयँ राष्ट्रपति चयन र सरकार गठनका लागि एएनसीले अन्य दलसँग गठबन्धनका लागि प्रयास थालेको छ । एएनसीले बहुमत गुमाए पनि सोही पार्टीबाट निर्वाचित वर्तमान राष्ट्रपति सिरिल रामाफोसा नै पुनः राष्ट्रपति पदका लागि दाबेदार छन ।  एएनसीले डेमोक्रेटिक अलायन्स र इकनोमिक फ्रिडम फाइटरसँग गठबन्धनको तयारी गरे पनि ज्याकव जुमाको पार्टी एमकेले भने राष्ट्रपतिमा दाबी गरेका छन । दक्षिण अफ्रिकामा संसदबाट नै राष्ट्रपति चयन हुने गर्दछ । राष्ट्रपति चयन भएपछि मात्र सरकार गठनको प्रक्रिया सुरु हुनेछ ।