पाल्पाको निस्दीमा जिप दुर्घटना हुँदा दुई २ जनाको मृत्यु

पाल्पाको निस्दीमा बुधबार बेलुका भएको जिप दुर्घटनामा दुई जनाको मृत्यु भएको छ भने १३ यात्रु घाइते भएका छन् । लु १ ज ३३२४ नम्बरको जिप निस्दी गाउँपालिका–४, मतियारडाँडा बेलखर्कस्थित भित्री कच्ची सडकखण्डमा दुर्घटना भएको हो । दुर्घटनामा परी निस्दी गाउँपालिका–४, घ्याङसीवासका १६ वर्षीय तेजन सोमै र निस्दी गाउँपालिका–४, बेलखर्कका ७ वर्षीय राजीव सुनारीको मृत्यु भएको प्रहरीले जनाएको छ । सोमै पूर्व नवलपरासीको अरुणखोलाबाट चढेका थिए भने सुनारी एक किलोमिटरनजिक लामीदमारबाट जिपमा चढेका थिए । १३ जना घाइतेको चितवन मेडिकल कलेज भरतपुर र मध्यविन्दु अस्पताल पूर्व नवलपरासीमा उपचार भइरहेको प्रहरीले जनाएको छ । घाइतेमध्ये अधिकांशको अवस्था सामान्य रहेको छ । घुम्ती कच्ची र उकालो सडकमा जिपको स्टार्ट बन्द भएपछि ब्रेक नलागेपछि दुर्घटना भएको बताइएको छ ।