सुन प्रकरणमा महराको बयान सकियो, हाजिरी जमानीमा छाड्ने सिआईबीको तयारी

सुन तस्करी प्रकरणमा पक्राउ परेका माओवादी उपाध्यक्ष तथा पूर्वसभामुख कृष्णबहादुर महरालाई हाजिरी जमानीमा छाड्ने तयारी प्रहरीले गरेको छ । जिल्ला सरकारी वकिलको कार्यालय काठमाडौंमा बयान सकिएसँगै महरालाई हाजिरी जमानीमा छाड्ने तयारी प्रहरीको केन्द्रीय अनुसन्धान ब्यूरो सीआईबीले गरेको हो । सरकारी वकिलको कार्यालयको रोहबरमा महरालाई छाड्न लागिएको बताइएको छ । त्यसको निर्णय भने हुन बाँकी रहेको छ । महरा हाजिरी जमानीमा छुटेपनि सुन तस्करी प्रकरणमा महरामाथि छानबिन भने जारी रहने प्रहरीले जनाएको छ । महरालाई प्रहरीले सोमबार कपिलवस्तुबाट पक्राउ गरेको थियो । स्वास्थ्य अवस्था कमजोर भएका कारण उनी पक्राउ लगत्तै नर्भिक अस्पतालमा उपचाररत छन् ।गत साउन २ मा ‘ब्रेक सु’मा लुकाएर ल्याइएको ६१ किलो सुन र २०७९ पुसमा विद्युतीय चुरोटमा ल्याइएको ९ किलो सुन तस्करीमा संलग्न चिनियाँ नागरिकसँग महराको नाम जोडिएको छ । त्यसबेला सिआइबीले उनीसँग बयान कागज गरेर मात्रै छाडेको थियो । यो प्रकरणमा महराका छोरा राहुल गत भदौ १३ गते नै पक्राउ परिसकेका छन् । राहुल हाल पुर्पक्षमा थुनामा छन् ।