दिल्लीका मुख्यमन्त्री केजरीवाल पक्राउ, गिरफ्तारीविरुद्ध ‘आप’ सर्वोच्चमा

नयाँ दिल्लीका मुख्यमन्त्री अरविन्द केजरिवाल पक्राउ प्रकरणमा आम आदमी पार्टी आप सर्वोच्च अदालत पुगेको छ । बिहीबार राति केजरिवाल पक्राउ पर्नुअघि नै आपको कानुनी टिम उच्च अदालतको फैसलाविरुद्ध सर्वोच्च अदालत पुगेको हो । भारतीय सञ्चारमाध्यमका अनुसार सर्वोच्चले आजै सुनुवाइ गर्न सक्ने सम्भावना छ । आपले सर्वोच्च अदालतसँग केजरिवालको पक्राउ रद्द गर्न माग गरेको बताएका छन् । दिल्ली मदिरा घोटालामा भारतीय प्रवर्तन निर्देशनालय ‘ईडी’ले केजरिवाललाई नौ पटक जवाफ दिन बोलाएको थियो । तर, उनले ईडीलाई बेवास्ता गर्दै आएका थिए । बिहीबा राति भने उनकै निवास पुगेर उनलाई ईडीले पक्राउ गरेको हो । मदिरा घोटाला प्रकरणमा करिब दुई घण्टाको सोधपुछपछि ईडीले केजरीवाललाई पक्राउ गरेको हो । उनलाई ईडीको केन्द्रीय कार्यालयमा राखिएको छ । लोकसभा चुनावअघि दिल्लीका मुख्यमन्त्री केजरीवाल पक्राउ पर्नुलाई राजनीतिक हिसाबले अर्थपूर्ण मानिएको छ । केजरीवाललाई पक्राउ गरेपछि उनको निवासबाहिर नेता–कार्यकर्ताको भिड लागेको छ । भारतमा यसै वर्ष बहालवाला मुख्यमन्त्रीलाई पक्राउ गरिएको यो दोस्रोपटक हो । यसअघि झारखण्डका मुख्यमन्त्री हेमन्त सोरेनलाई पक्राउ गरिएको थियो । मदिरा घोटाला प्रकरणमा करिब १ सय करोड भारतीय रुपैयाँ बराबरको भ्रष्टाचार भएको आरोप लगाइएको छ ।