बाँसबारी जग्गा प्रकरणमा ‘सीआईबी’ले लियो बिनोद चौधरीसँग बयान

बाँसबारी जग्गा हिनामिना प्रकरणमा मुछिएका उद्योगपति एवम् नेपाली कांग्रेसका सांसद विनोद चौधरीसँग नेपाल प्रहरीको केन्द्रीय अनुसन्धान व्युरो ‘सीआईबी’ले बयान लिएको छ । सरकारी वकिलको कार्यालयमा आज बिहान चौधरीको बयान लिइएको हो । बयानका लागि चौधरी आफै आज विहान आठ बजे सरकारी वकिलको कार्यालय, काठमाडौंमा पुगेका थिए । बयान सकिए लगत्तै सञ्चारकर्मीसँग कुरा गर्दै सांसद चौधरीले सरकारी जग्गा हिनामिनामा आफ्नो कुनै संलग्नता नरहेको प्रतिक्रिया दिएका छन् ।  जग्गा हिनामिना भएको भनेर राजनीतिकरण गरिएको उनको आरोप छ । 
४२ वर्ष अगाडि बाँसबारी जस्तो अनकन्टारमा कौडीको पनि भाउमा नबिक्ने जग्गालाई आधार बनाएर ’पब्लिक प्राइभेट’ साझेदारीको एउटा नविनतम सोचलाई जुन किसिमबाट राजनीतिकरण गरिएको उनको भनाइ छ । १० रोपनी जग्गामा आफ्नो ग्रुपले कुदृष्टि राख्छ भनेर सोच्नु नै एउटा विकृत मानकिता उपज भएको उनको भनाइ छ । बयानकै लागि ‘सीआईबी’ले सभामुख देवराज घिमिरेलाई पत्र लेखेर सांसद चौधरीमाथि पनि अनुसन्धान भइरहेको जानकारी गराएको थियो । बाँसबारी जग्गा हिनामिना प्रकरणमा सीआईबीले अनुसन्धान जारी राखेको छ । बाँसबारी छालाजुत्ता कारखाना लिमिटेडको नाममा दर्ता कायम रहेको १० रोपनी जग्गा च्याम्पियन फुटवेयर लिमिटेडको नाममा स्वामित्व हस्तान्तरण भएको थियो । विनोद चौधरी च्याम्पियन फुटवेयर लिमिटेडका शेयर धनी एवम् तत्कालीन सञ्चालक समिति सदस्य हुन् । सरकारी जग्गा गैरकानुनी रुपमा च्याम्पियन फुटवेयर लिमिटेडको नाममा स्वामित्व हस्तान्तरण गरेको खुलेपछि उनीपनि अनुसन्धानमा तानिएका हुन । अहिले जग्गाको स्वामित्व विनोद चौधरीको नाममा नभएपनि सरकारी जग्गा व्यक्तिको नाममा ल्याउन भूमिका खेलेको देखिएकाले भन्दै सीआइबीले अनुसन्धान गरिरहेको हो । यही घटनामा  माघ १८ गते बिनोदका भाई अरुण चौधरीसहित ३ जना पक्राउ परेका थिए । विनोदकै भाई वसन्त चौधरीलाई बोलाएर कागज गराइएको छ ।