कोशी प्रदेश सरकार र पहिचान पक्षधर बीच आज वार्ता

कोशी प्रदेश सरकार र पहिचान पक्षधरबीच आज वार्ता हुने भएको छ । प्रदेशको नाम कोशी खारेज गरेर पहिचानको आधारमा पुनः नामकरण गर्नुपर्ने माग राख्दै आन्दोलनमा रहेको ‘प्रदेश नं. १ पुन नामाङ्कन संयुक्त संघर्ष समिति’ले वार्ता समिति गठन गरेपछि आज दिउसो सरकारसँग वार्ता हुन लागेको हो । वार्ता दिउँसो तीन बजेपछि विराटनगरको एक होटलमा हुने तय भएको छ । मन्त्रिपरिषदको बैठकले पहिचान पक्षधरसँग वार्ता गर्न भौतिक पूर्वाधार विकास मन्त्री कमलप्रसाद जवेगुको संयोजकत्वमा तीन सदस्यीय वार्ता समिति गठन गरेको थियो । संयुक्त संघर्ष समितिको बैठकले पुनः नामाङ्कन अभियान समितिका अध्यक्ष डकेन्द्रसिंह थेगिम सहित सहभागी समिति बनाएको छ । हिक्मतकुमार कार्की नेतृत्वको सरकारले २०७९ फागुन १७ गते प्रदेशको नाम कोशी राखेपछि पहिचान पक्षधर पहिचानका आधारमा नाम राख्नुपर्ने मागसहित आन्दोलनमा छन् । वार्तामा कोशी प्रदेश नाम खारेज गरी पहिचानसहितको पुनः नामांकन गर्नुपर्ने मुख्य एजेण्डा उठाउने असन्तुष्ट समूहको तयारी छ ।