पक्राउ परेका उद्योगी चौधरीलाई ग्रान्डी अस्पतालमा सारियो

बाँसबारी छाला जुत्ता कारखानाको १० रोपनी जग्गा हडपेको अभियोगमा  बिहीबार पक्राउ परेका उद्योगपति अरुण चौधरीलाई ग्रान्डी अस्पतालमा सारिएको छ । पक्राउ गरेपछि चिरायु अस्पतालमा राखिएका चौधरीलाई अस्पतालले ग्रान्डीमा रिफर गरेको हो । अरुणसँगै पक्राउ परेका तत्कालीन छाला जुत्ता कारखानाका अध्यक्ष अजितनारायण सिंह थापालाई पनि ग्रान्डी रिफर गरिएको छ । ८२ वर्षीय थापा मुटुका बिरामी हुन् । उनीहरुलाई हिरासतमा राख्न प्रहरीले जिल्ला अदालत काठमाडौंबाट चार दिनको अनुमति बिहीबार नै लिएको छ । अदालतबाट पक्राउ पुर्जी लिएर सोही प्रकरणमा चौधरी, थापा र सञ्रुजय सिंह ठाकुर पक्राउ परेका थिए । पक्राउ परेका चौधरी सीजी होल्डिङ्सका अध्यक्ष तथा प्रबन्ध निर्देशक र थापा बाँसबारी छाला जुत्ता कम्पनीका तत्कालीन अध्यक्ष हुन् । तीनै जनामाथि अनुसन्धान गर्न भनेर सीआईबीमा काठमाडौं महानगरपालिका वडा नम्बर ३ का ४८ जना बासिन्दाले उजुरी दिएका थिए । २०२० सालमा चीन सरकारको अनुदान सहयोगमा बाँसबारी छाला तथा जुत्ता कारखाना खोलिएको थियो । सोही कारखानाको जग्गा प्रतिरोपनी २ लाख ५० हजारका दरले कुल १५ लाख रुपैयाँमा १० रोपनी चौधरी समूहले किन्दा चलखेल भएको प्रहरीको दाबी छ ।।