भारतीय नम्बर प्लेटको जीप त्रिशूलीमा खस्यो

नारायणगढ–मुग्लिन सडक खण्डअन्तर्गत चितवनको इच्छाकामना गाउँपालिका ५, स्थित त्रिशूली नदीमा भारतीय नम्बर प्लेटको जीप खसेको भेटिएको छ । आज बिहान ४ः४० बजेको समयमा ३ नम्बर पुलनजिक सडकबाट ८०/८५ मिटर तल त्रिशूली नदीको पानीभित्र बत्ती बलेजस्तो देखिएपछि प्रहरीले खोजी सुरु गरेको थियो । घटनास्थलमा बीआर ०९ जीसी १४३० नम्बरको भारतीय प्लेट फेला परेको हो । गोताखोरको टोलीले खोजी कार्य गर्दा सेतो रङको भारतीय बलेरो फेला परेको चितवन प्रहरीले जनाएको छ । जिल्ला प्रहरी कार्यालय चितवनले त्रिशुली नदीमा खसेको जिपका चालक सकुशल रहेको बताएको छ । भारतीय नम्बर प्लेटको बोलेरो जिप दुर्घटनामा कुनैपनि मानवीय क्षति नभएको चितवन प्रहरीले जनाएको हो । गाडी दुर्घटना हुनु अघि चालकले हाम फालेर ज्यान जोगाएको र अर्को गाडीमा कतै गएको प्रहरीले प्रतक्ष्यदर्शीलाई उल्लेख गर्दै जनाएको हो ।दुर्घटनामा परेको जिप गोताखोरको टोलीले बाहिर निकालिसकेको छ ।