विद्युत् प्राधिकरणले  ६० अर्ब रुपैया बराबरको साधारण शेयर बिक्री गर्ने

सार्वजनिक संस्थानहरूमध्ये पछिल्ला दिनमा आर्थिक रूपमा सबल बन्दै गएको नेपाल विद्युत् प्राधिकरणले  ६० अर्ब रुपैया बराबरको साधारण शेयर आइपिओ बिक्री गर्ने भएको छ । प्राधिकरणले संस्थाको वित्तीय पुनः संरचना गरी नेपाल विद्युत् प्राधिकरण ऐन, २०४१ बमोजिम संस्थाको शेयर सर्वसाधारणमा बिक्री गर्ने भएको हो । शेयर बिक्रीका लागि अर्थ मन्त्रालयले सहमति प्रदान गरिसकेको छ । अर्थको सहमतिपछि ऊर्जा जलस्रोत तथा सिँचाइ मन्त्रालयले आवश्यक प्रस्ताव मन्त्रिपरिषदमा पेस गर्ने तयारी गरेको छ । प्राधिकरणको शेयरको प्रतिकित्ता किताबी मूल्य करिब एक सय २५  कायम गर्ने र त्यसमा त्यति नै रकम प्रिमियम थप गरी शेयर निष्कासनको प्रस्ताव गरिएको छ । यस हिसाबले प्राधिकरणको शेयर किन्न चाहने सर्वसाधारणले प्रतिकित्ता  दुई सय ५० रुपैया खर्च गर्नुपर्नेछ । प्राधिकरणको हाल अधिकृत पुँजी  एक खर्ब २५ अर्ब रुपैया बराबर छ । प्राधिकरणको अधिकृत पुँजी तीन खर्बको १० प्रतिशत शेयर पहिलो चरणमा सर्वसाधारणलाई जारी गर्न प्रस्ताव गरिएको छ । प्राधिकरणको आव २०७८÷७९ सम्मको शेयर पुँजी  एक खर्ब ७५ अर्ब र सञ्चित नाफासहितको जगेडा कोष रु २७ अर्ब गरी जम्मा  दुई खर्ब दुई अर्ब निष्कासन प्रयोजनका लागि रहेको छ । सर्वसाधारणलाई शेयर जारी गरी प्राप्त हुने रकम दीर्घकालीन लगानीका रूपमा जलाशययुक्त आयोजना निर्माण, प्रसारण तथा वितरण लाइनको विस्तार तथा सुदृढीकरण कार्यमा उपयोग गरिने प्राधिकरणले जनाएको छ । प्राधिकरणले गत आर्थिक वर्ष २०७९÷८० मा रु १२ अर्ब ३३ करोडको खुद नाफाको प्रक्षेपण गरेको छ । प्रणालीको विद्युत् चुहावट हाल १३ प्रतिशत बराबर छ ।।