राष्ट्रिय पुरुष भलिबल प्रतियोगिताको उपाधि नेपाल पुलिसलाई

साविक विजेता सशस्त्र प्रहरी बलको एपीएफ क्लबलाई हराउँदै नेपाल पुलिस क्लबले ३४ औँ राष्ट्रिय पुरुष भलिबल प्रतियोगिताको उपाधि जितेको छ । सुर्खेतको वीरेन्द्रनगरमा रहेको खुलामञ्चको कोर्टमा आज भएको फाइनलमा पुलिसले एपीएफलाई ३–१ को सेटले हराएको हो । पुलिसले सुरुवाती सेट गुमाएपनि त्यसपछिको तीन सेट आफ्नो पक्षमा पार्दै उपाधि जित्न सफल भएको हो । पहिलो सेट एपिएफले २५–२२ ले आफ्नो पक्षमा पारेको थियो ।  दोस्रो सेट २५–१९ ले जित्दै पुलिसले खेललाई १–१ सेटको बराबरीमा ल्यायो । त्यसपछि  तेस्रो सेट २५–१८ र चौथो सेट २५–२३ को जित निकाल्दै प्रहरीले उपाधि हात पा¥र्यो । यससँगै पुलिसले समूह चरणमा एपिएफसँग भोगेको हारको बदला लिएको छ । समूह चरणमा पुलिस एपिएफसँग ३–१ को सेटमा पराजित भएको थियो । उपाधिसँगै पुलिसले १ लाख रुपैयाँसँगै शिल्ड, मेडल र प्रमाणपत्र प्राप्त गरेको छ । विभागीय त्रिभुवन आर्मी क्लबलाई ३–१ को सेटमा पराजित गर्दै गण्डकी प्रदेशले ३४औं राष्ट्रिय भलिबल प्रतियोगितामा तेस्रो स्थान हासिल गरेको छ । २० पुसबाट सुरु भएको प्रतियोगितामा तीन विभागसँगै सात प्रदेश गरी १० टोलीको सहभागिता रहेको थियो ।