प्रधानमन्त्री कप महिला क्रिकेटको फाइनल आज एपीएफ र  कोशी भिड्दै

प्रधानमन्त्री कप महिला राष्ट्रिय क्रिकेट प्रतियोगिताको उपाधि लागि एपीएफ क्लब र कोशी प्रदेशबीच प्रतिस्पर्धा जारी छ ।  कीर्तिपुरस्थित त्रिवि मैदानमा एपीएफले टस जितेर सुरुमा ब्याटिङ गरिरहेको हो ।  दुई टिम जारी प्रतियोगितामा तेस्रो पटक आमनेसामने हुन लागेका हुन् । सीता राना मगरको कप्तानीमा रहेको एपीएफ लगातार तेस्रो पटक कोशीलाई पराजित गर्दै उपाधि जित्ने लक्ष्यमा छ । जारी प्रतियोगितामा एपीएफ अपराजित छ ।राष्ट्रिय क्रिकेट टिमकी पूर्वकप्तान रुविना क्षेत्रीको नेतृत्वमा रहेको कोशी, एपीएफसँग निरन्तरको हारमा पूर्णविराम लगाउँदै च्याम्पियन बन्ने लक्ष्यमा छ । प्रधानमन्त्री कप महिला क्रिकेटमा एपीएफ सर्वाधिक सफल ५ पटकको विजेता हो । कोशी एक पटक सन् २०१९ मा च्याम्पियन बनेको थियो ।