बसको ठक्करवाट मोटरसाइकलमा सवार दुई जनाको मृत्यु ,स्थानीयद्वारा बसमा आगजनी

वीपी राजमार्ग अन्तर्गत सिन्धुलीको सुनकोशी गाउँपालिका–३ बोहोरेटारमा बस र मोटरसाइकल ठोक्किँदा दुई जनाको मृत्यु भएको छ । आज बिहान करिब सवा ८ बजेतिर बा. प्र. ०१–००६ ख ४५९३ नम्बरको बस र विपरीत दिशामा रहेको बा. ६० प ३५४५ नम्बरको मोटरसाइकल ठोक्किँदा मोटरसाइकलमा सवार दुई जनाको मृत्यु भएको हो । सुनकोसी गाउँपालिका–३ बोहोरेटारमा सोमबार भएको दुर्घटनामा परी मोटरसाइकल चालक खोटाङ तुवाचुङ नपा–२ का २० वर्षीय सुशन राई र पछाडि सवार खोटाङ दिक्तेल नगरपालिका–१० की १८ वर्षीया मुनाकला राईको मृत्यु भएको हो । बस र चालकलाई इलाका प्रहरी कार्यालय खुर्कोटले नियन्त्रणमा लिएको छ । दुर्घटनापछि स्थानीयले मोटरसाइकललाई ठक्कर दिने बसमा आगजनी गरेका छन् भने सडकखण्डमा अवरोध गरिएको छ । घटनास्थलमा अहिले जिल्ला प्रहरी कार्यालय सिन्धुलीवाट ठूलो संख्यामा सुरक्षाकर्मी परिचालन गरिएको छ । सडक खुलाउन पहल भैरहेको प्रहरीले जनाएको छ ।