भूकम्प प्रभावित जिल्लामा एक अर्ब रुपैयाँ निकासा

भूकम्प प्रभावितका लागि अस्थायी आवास निर्माणका लागि सरकारले एक अर्ब रुपैयाँ निकासा गरेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणकाअनुसार अर्थ मन्त्रालयबाट निकासा भएको रकममध्ये ९३ करोड रुपैयाँ सम्बन्धित जिल्लामा पठाइएको छ । निकासा भएको रकम जाजरकोटमा ५४ करोड, रुकुम पश्चिममा ३४ करोड र सल्यानमा पाँच करोड रहेको छ । प्राधिकरणका अनुसार हिजो ९३ करोड रुपैयाँ भूकम्प प्रभावित जिल्लामा पठाइएको छ । यसअघि कोषमा जम्मा भएको रकम पठाइएकोमा अहिले अर्थ मन्त्रालयबाट प्राप्त रकम पठाइएको हो । अर्थबाट निकासा भएको यो रकम पहिलो हो । गएको कात्तिक २७ को मन्त्रिपरिषद् बैठकले १० अर्ब रुपैयाँ पठाउने निर्णय गरेको थियो । त्यसअनुसार अर्थले एक अर्ब भूकम्प पीडितका लागि निकासा गरेको हो । यसअघि प्राधिकरणले अस्थायी आवास निर्माणका लागि एक अर्ब ४१ करोड रुपैयाँ पठाइसकेको छ । यसबाट ती जिल्लामा अवास निर्माणको काम थालिएको छ । पछिल्लो तथ्याङ्कअनुसार झण्डै ६० हजार लाभग्राहीमध्ये १५ हजारसँग सम्झौता भएकोमा पहिलो किस्ताबापत चार हजार तीन सय ६४ घर निर्माण भइसकेका छन् ।