एमालेको मध्यपहाडी संकल्प यात्रा कोशी प्रदेशको भोजपुर पुग्यो

नेकपा एमालेको मध्यपहाडी संकल्प यात्राको १४ औँ दिन आज कोशी प्रदेशको भोजपुर पुगेको छ । पहिचान पक्षधरको अवरोधका बीच एमाले टोली यतिबेला पूर्वी पहाडी जिल्लाका कार्यक्रममा सहभागी भइरहेको हो । अध्यक्ष केपी ओलीसहितको टोली  खोटाङको दिक्तेल हुँदै आज भोजपुर पुगेको हो । आज भोजपुरमा सभा भने नरहेको एमालेले जनाएको छ । बिहान टेम्केमैयुङमा कायकर्ताहरूसँग भेटघाट गरेको एमालेले दिउँसो भोजपुर बजारमा जनभेटघाट र टक्सार बजारको अनुगमन तथा उद्योगी व्यापारीहरूसँग छलफल गर्ने कार्यक्रम छ । टोलीले भोजपुरका स्थानीय नेता–कार्यकर्तासँग अन्तरक्रिया र छलफल पनि गर्नेछ । टोली आज भोजपुरमै बसेर भोलि बिहान धनकुटा प्रस्थान गर्ने तालिका छ । एमाले टोली तेह्रथुम हुँदै पाँचथर पुग्ने कार्यक्रम छ । एमालेको यात्रा पुस एक गते पाँचथरमा समापन हुनेछ ।