उदयपुरको अँधेरीमा पिकनिक गएको स्कुल बस दुर्घटना, तीन जनाको मृत्यु

काठमाडौं । उदयपुरमा पिकनिक गएको स्कुल बस दुर्घटना हुँदा तीन जनाको मृत्यु भएको छ । दुर्घटनामा परी ३७ जना घाइते भएका छन् । मदन भण्डारी राजमार्गअन्तर्गत् उदयपुरगढी गाउँपालिका–७ अँधेरीमा १–०५–००१ ख ००४४ नम्बरको स्कुल बस दुर्घटना भएको हो । दुर्घटनामा परी मृत्यु हुनेमा चालक बिखन चौधरी, सात वर्षीया सन्या चौधरी र छ वर्षीय विकास चौधरी रहेको प्रहरीले जानकारी दिएको छ । गम्भीर घाइते भएका १२ जनालाई उपचारका लागि विराटनगरतर्फ लगिएको छ भने २५ जना घाइतेको जिल्ला अस्पताल उदयपुरमा उपचार भइरहेको छ । अन्नपूर्ण विद्यालयको बस त्यहीँका स्थानीयले पिकनिक प्रयोजनका लागि लगेको बताइएको छ । दुर्घटनाबारे अनुसन्धान भइरहेको प्रहरीले जानकारी दिएको छ ।