टीकापुर हत्याकाण्डका कैदीको सजाय मिनाहा गर्ने सरकारको नाममा कारण देखाऊ आदेश

टीकापुर हत्याकाण्डका कैदीको सजाय मिनाहा गर्ने सरकारको नाममा सर्वोच्च अदालतले कारण देखाऊ आदेश जारी गरेको छ । थप कैदीको सजाय मिनाहा दिने राष्ट्रपतिको निर्णयविरुद्धको निवेदनमा सर्वोच्च अदालतले राष्ट्रपति कार्यालयसहित सरकारको नाममा कारण देखाउ आदेश जारी गरेको हो । सरकारको सिफारिसमा राष्ट्रपति रामचन्द्र पौडेलले सजाय माफी दिने निर्णय गरेका थिए । सो निर्णयलगत्तै टीकापुर हत्याकाण्डमा ज्यान गुमाएका नेपाल प्रहरीका इन्स्पेक्टर केशव बोहराकी श्रीमती शारदाले सर्वोच्चमा रिट दायर गरेकी थिइन् । आज न्यायाधीश प्रकाशकुमार ढुंगानाको एकल इजलासले कारण देखाउ आदेश दिएको हो । यसअघि उक्त निवेदन पटकपटक पेसीमा चढाइए पनि विभिन्न कारण सुनुवाइ हुन सकेको थिएन । शारदा कडायत, मन्धरादेवी विष्टलगायतले गत कात्तिक २१ गते सो निवेदन दिएका हुन । सरकारको सिफारिसमा राष्ट्रपति रामचन्द्र पौडेलले संविधान दिवसको अवसर पारी कैद मिनाहा गरिदिएपछि हरिनारायण चौधरी, वीरबहादुर चौधरी, प्रदीप चौधरीलगायत गत असोज ३ गते रिहा भएका थिए । २०७२ भदौमा कैलालीको टीकारपुरमा ८ सुरक्षाकर्मी र एक दूधे बालकको ज्यान जाने गरी भएको उक्त हत्याकाण्डमा जन्मकैद सजाय सुनाइएका रेशम चौधरी गणतन्त्र दिवसको अवसरमा सजाय मिनाहा पाएर गत जेठ १५ गते नै छुटेका थिए। रेशम चौधरीको कैद मिनाहा गर्ने राष्ट्रपतिको निर्णय बदर हुनुपर्ने माग राखी टीकापुर घटनामा श्रीमान् गुमाएका इन्स्पेक्टर बोहराकी श्रीमती शारदाले गत जेठ १६ गते नै सर्वोच्चमा रिट दायर गरेकी थिइन् । रिटको सुनुवाइमा ढिलाइ भएकाले प्राथमिकता दिन माग राखी उनले थप निवेदन पनि दिएकी छिन ।