नेपाल संवतलाई सरकारको दस्ताबेजमा लेख्ने प्रधानमन्त्री दाहालको घोषणा

काठमाडौं । प्रधानमन्त्री पुष्पकमल दाहालले नेपाल संवतलाई सरकारको दस्ताबेजमा लेख्ने घोषणा गरेका छन् । शनिवार काठमाडौंमा आयोजित साहित्यकार पद्यरत्न तुलाधरको पाँचौं स्मृति दिवसका अवसरमा आयोजित कार्यक्रमलाई सम्बोधन गर्दै प्रधानमन्त्री दाहालले नेपाल संवत नै राष्ट्रिय संवत भएकाले सरकारको दस्ताबेजमा लेख्न आवश्यक भएको बताएका हुन् । उनले नेपाल संवतलाई राष्ट्रिय संवत भनेर मात्रै नपुग्ने उल्लेख गर्दै व्यवहारमा कार्यान्वयन गर्नुपर्ने पनि बताए । 
प्रधानमन्त्री दाहालले माओवादीले २०८४ को निर्वाचनमा जनताको विश्वास जितेर ०६४ कै सरह सरकारको नेतृत्व गर्ने दाबी समेत गरे । प्रधानमन्त्री कहिलेसम्म रहने भन्ने कुरालाई भन्दा पनि आफूले सुशासन, सामाजिक न्याय र समृद्धिको कुरालाई प्राथमिकतामा राखेको दाबी पनि गरे । 
प्रधानमन्त्री दाहालले पछिल्लो समय अर्थतन्त्रमा केही सुधार हुँदै गएको पनि उल्लेख गरे । राजश्व वृद्धि, पर्यटकमा वृद्धि र रेमिट्यान्स उत्साहजनक हुनुले अर्थतन्त्रमा सुधार भइरहेको पुष्टि गरेको उनको भनाइ छ । उनले सरकार ढाल्न प्रतिक्रियावादी शक्तिहरु सक्रिय भएको आरोप पनि लगाए ।