बाराको कलैयामा विद्यालयका प्रधानाध्यापक हत्या आरोपमा प्रेमिकासहित छ जना प्रहरी नियन्त्रणमा

काठमाडौ । बाराको कलैयास्थित बाल एकता बोडिङ्ग स्कुलका संचालक रुपेश स्वर्णकारको आरोपमा प्रहरीले एक युवतीसहित छ जनालाई पक्राउ गरेको छ । प्रहरीले हिजो बारा कलैयाकै एकजना युवतीलाई पक्राउ गरी अनुसन्धान सुरु गरेको थियो । हत्यामा संलग्न रहेको आशंकामा अन्य पाँचजनालाई पनि पक्राउ गरिएको प्रहरीले जनाएको छ । पक्राउ परेकी युवती बोर्डिङ स्कुलकै पूर्वकर्मचारी रहेको र अन्य दुईजना पनि बोर्डिङ स्कुलकै कर्मचारी रहेका छन । बाँकी तीनजना भारतीय रहेको प्रहरीले जनाएको छ । मुख्य योजनाकारसहित ६ जना पक्राउ परेपछि सोधपुछका क्रममा स्वर्णकारको यसअघि पनि हत्याको प्रयास भएको खुलेको प्रहरीले जनाएको छ । सोमबार दिउँसो पसलबाट खाजा लिएर स्कुल फर्किरहेका स्वर्णकारलाई दुईवटा मोटरसाइकलमा आएका चारजना अज्ञात व्यक्तिले कलैया मदर्सा टोलस्थित ग्रिन भ्याली बोर्डिङ स्कुलअगाडि ४ राउन्ड गोली हानेका थिए । गोली लागेर घाइते भएका उनको उपचारका क्रममा मृत्यु भएको थियो । स्वर्णकारको आज कलैया स्थित पसाहा खोलामा अन्त्येष्टि गरिएको छ ।  अन्त्येष्टिमा व्यापारी, शिक्षक, राजनितिक दलका नेता लगायत सयौं सहभागी भएका छन ।