विपीन जोशीको अवस्था पत्ता लगाउन अन्तर्राष्ट्रिय समुदाय गुहार्ने इजरायली राजदूतको प्रतिक्रिया

नेपालका लागि इजरायली राजदूत हनान गोडेरले हमासले इजरायलमा गरेको आक्रमणपछि बेपत्ता भएका नेपाली विद्यार्थी विपीन जोशीको अवस्था पत्ता लगाउन अन्तर्राष्ट्रिय समुदाय गुहार्ने बताएका छन । आज बिहान इजरायलमा हमासको आक्रमणमा मृत्यु भएकामध्ये तीन जनाको शव त्रिभुवन अन्तर्राट्रिय विमानस्थलमा बुझाउने क्रममा राजदूत हनानले जोशी अवस्था पत्ता लगाउनका लागि आफूहरू खोजीमा रहेको बताएका हुन । उनले युद्धसँग सम्बन्ध नै नभएका ती बन्धकलाई छोड्न आग्रह समेत गरे । 
हमासको आक्रमणबाट ज्यान जोगाएर विमानस्थलमा आइपुगेका धनबहादुर चौधरीले बङ्करमा लुकिरहेको समयमा आफूहरुमाथि बम आक्रमण भएको बताए । 
बंकरमै लुकिरहेको समयमा एक्कासी ग्रेनाइट र बन्दुक आक्रमण हुँदा आफू भाग्यले बाचेपछि साथीहरुलाई बचाउन नसकेको चौधरीले बताए । हमासको आक्रमणमा दश नेपाली विद्यार्थीको मृत्यु भएको थियो भने चार जना घाइते भएका थिए ।