नेपाल प्रहरी र सशस्त्र प्रहरीको कार्यादेश र कार्यक्षेत्र स्पष्ट पार्न सांसदहरुको माग

काठमाडौ । सशस्त्र प्रहरी बल, नेपाल विधेयकले नेपाल प्रहरी र सशस्त्र प्रहरी बलको कार्यादेश र कार्यक्षेत्र स्पष्ट पार्नुपर्ने माग सांसदहरुले गरेका छन । सोमवारको बैठकमा सशस्त्र प्रहरी विधयेकमाथिको छलफलमा सांसदहरुले सशस्त्र प्रहरीको परिचालन प्रमुख जिल्ला अधिकारीमार्फत हुने व्यवस्थाले राजनीतिक हस्तक्षेप निम्त्याउने खतरा रहेको बताएका हुन । नेकपा एमालेका सांसद योगेश भट्टराईले सशस्त्र प्रहरी बल अर्धसैनिक चरित्रको रहेको उल्लेख गर्दै चेन अफ कमाण्डमा चल्नेगरी विधेयक ल्याउनुपर्ने बताए । 
नेपाली कांग्रेस संसदीय दलका प्रमुख सचेतक श्याम घिमिरेले सशस्त्र प्रहरीको महानिरीक्षकको दज्र्यानी चिन्ह प्रधानमन्त्री या गृहमन्त्रीले लगाइदिने कानूनी प्रबन्ध आवश्यक रहेको बताए । 
नेकपा माओवादी केन्द्रकी सांसद विमला सुवेदीले सशस्त्र प्रहरी बल नेपाललाई संविधानको मर्म र भावनाअनुरुप जनउत्तरदायि बनाउन आवश्यक रहेको बताइन । 
राष्ट्रिय स्वतन्त्र पार्टीका सांसद गणेश पराजुलीले नेपाल प्रहरी विधेयक र सशस्त्र प्रहरी बलको विधेयकको प्रश्तावना नै हुबहु रहेको भन्दै गृहमन्त्रीको आलोचना गरे । 
सांसदहरुले विधेयकहरुलाई संघीयता कार्यान्वयनको रुपमा समेत हेरिएको उल्लेख गर्दै राजनीतिक स्वार्थ राखिएको भन्दै आशंका व्यक्त समेत गरेका छन । विधेयक गृहमन्त्री रमेश लेखकले गत माघ २७ गते प्रतिनिधि सभामा दर्ता गराएका थिए।